Тантанали маросимдан сўнг бўлиб ўтган суҳбатда Шри-Ланка Президенти Ўзбекистоннинг Коломбодаги биринчи элчиси тайинланганини тарихий воқеа сифатида баҳолаб, бу қадам икки мамлакат ўртасидаги кенг қамровли ва барқарор ҳамкорликни янги босқичга олиб чиқишини қайд этди.
Президент Анура Кумара Диссанаяке, шунингдек, Ўзбекистонни Шри-Ланканинг Марказий Осиёдаги ишончли ва истиқболли ҳамкори деб билишини таъкидлаб, ўзаро ишонч, прагматизм ва ҳурматга асосланган стратегик муносабатларни йўлга қўйишга тайёр эканини қайд этди.
Мулоқот чоғида, сиёсий мулоқотни кенгайтириш, шартномавий-ҳуқуқий базани мустаҳкамлаш, савдо, инвестициялар, туризм, таълим, логистика ва агротехнологиялар соҳаларида ҳамкорликни ривожлантириш, иқтисодий ислоҳотлар, рақамлаштириш ва тадбиркорликни ривожлантириш борасида ўзаро тажриба алмашиш масалалари муҳокама қилинди.
Шри-Ланка раҳбари икки мамлакат ўртасида тўғридан-тўғри бизнес алоқаларни йўлга қўйиш, бизнес-форумлар, кўргазмалар ва ишбилармонлар ташрифларини ташкил этиш муҳимлигига алоҳида урғу берди. Шу йўналишда қатор ташаббусларни, жумладан Қўшма ҳукуматлараро комиссия тузиш таклифини илгари сурди.
Бундан ташқари, Ўзбекистон ва Шри-Ланка ўртасида савдо-иқтисодий муносабатларни ривожлантириш, ўзаро товар айирбошлаш ҳажмини кескин ошириш учун улкан имконият мавжудлиги урғуланди. Бу икки мамлакат ташқи савдоси географиясини кенгайтириш, экспорт-импорт номенклатурасини янги маҳсулотлар ва рақобатбардош товарлар ҳисобига бойитишга хизмат қилиши таъкидланди.
Учрашув якунида Шри-Ланка Президенти Анура Кумара Диссанаяке Ўзбекистон Президенти Шавкат Мирзиёевга самимий салом ва энг эзгу тилакларини йўллаб, тинчлик ва барқарор тараққиётга хизмат қиладиган самарали ҳамкорликка умид билдирди.
