Исроил БМТнинг Ғазо секторига инсонпарварлик ёрдамини етказиб бериш учун йўлаклар очишини эълон қилди ва аллақачон контейнерларни парашютдан ташлашни бошлади. Бу ҳақда Reuter хабар берди.
Исроил мудофаа армияси хабарида айтилишича, сиёсий раҳбарият кўрсатмаларига мувофиқ ва "Ғазо секторида қасддан очарчилик ҳақидаги ёлғон даъволарни рад этиш мақсадида" озиқ-овқат ва дори-дармонларни етказиб бериш учун БМТ карвонларининг хавфсиз ҳаракатланиши учун гуманитар йўлаклар яратилади.
Кўп ўтмай парашютда ёрдам ташлаш қайта бошланди, деб хабар берди Reuters агентлигига ЦАҲАЛ вакили. Бу ҳақда армия баёнотида эълон қилинган, хусусан, "халқаро ташкилотлар томонидан тақдим этилган ун, шакар ва консервалар солинган еттита контейнер" ташланиши айтилган. Reuters’нинг Фаластиндаги манбалари ҳам Ғазо шимолида юк ортилган парашютлар кўзга ташланганини тасдиқлади.
Гуманитар ташкилотлар эса парашютдан ташлаш ёрдам етказишнинг ўта самарасиз усули эканини таъкидлайди.
Шу ҳафтада 100 дан ортиқ ташкилот Ғазода очарчилик авж олаётганидан огоҳлантирганди. Исроил армияси ўз баёнотида буни рад этган ва бундай баёнотларни "Ҳамас томонидан илгари сурилган ёлғон кампания" деб атаган.
"Ғазо аҳолисига ёрдамни тақсимлаш масъулияти БМТ ва халқаро гуманитар ташкилотлар зиммасида. Шу сабабли, улардан ёрдамни тақсимлаш самарадорлигини ошириш ва унинг Ҳамас қўлига ўтиб кетишига йўл қўймаслик бўйича саъй-ҳаракатлар бажарилиши кутилмоқда", дейилади Исроил армияси баёнотида.
Шунингдек, баёнотда айтилишича, "шу ҳудуднинг 900 минг аҳолисига хизмат кўрсатадиган" сувни чучуклаштириш заводига электр энергияси етказиб бериш қайта тикланган.
Исроил март ойида Ғазога барча инсонпарварлик ёрдамини тўхтатди, май ойида ёрдам янги чекловлар билан қайта тикланди: озиқ-овқат тақсимоти Ғазодаги Америка-Исроил гуманитар жамғармасига топширилди. Ушбу жамғарма томонидан ташкил этилган ёрдам марказлари атрофида тез-тез юз берган ҳодисалар БМТ маълумотларига кўра, юзлаб фаластинликлар ўлимига сабаб бўлган. Гувоҳлар, жумладан, ушбу марказларнинг собиқ қўриқчилари бу одамларнинг аксариятининг ўлимида Исроил қўшинларини айблади.
Исроил эса тинч аҳоли дуч келаётган муаммоларга Ҳамасни айбдор қилиб кўрсатмоқда.
Шанба куни Ғазо соғлиқни сақлаш вазирлиги тўйиб овқатланмаслик оқибатида йил бошидан буён 127 киши, жумладан, беш нафар бола вафот этганини маълум қилди.
