Россия Федерацияси Федерал Кенгаши раиси Валентина Матвиенко, Ғарб санкцияларига қарамай, Женевада бўлиб ўтган аёл спикерлар халқаро саммитида иштирок этди. У форум минбаридан чиқиш қилиб, Украина расмийларини Донбассдаги тинч ҳудудларга ҳужум уюштирганликда айблади.
Матвиенконинг сўзларига кўра, Москва “қон тўкилишини тўхтатиш” мақсадида можаро ҳудудига аралашишга мажбур бўлган. У Ғарб давлатларини “ахборот уруши” олиб бораётганликда ва “антируссия риторикаси”ни кучайтираётганликда айблаб, санкцияларни бекор қилишга чақирди. Шунингдек, хорижий етакчиларни Донбассга ташриф буюришга таклиф қилди.
ТАСС агентлигининг ёзишича, Матвиенко бошчилигидаги Россия делегацияси таркибига сенаторлар Константин Косачёв, Лилия Гумерова, Андрей Денисов ҳамда Давлат Думаси депутатлари Пётр Толстой ва Леонид Слутский кирган.
Швейтсария ОАВларига кўра, санкциялар рўйхатида бўлган делегатлар учун алоҳида рухсатномалар берилган. Эслатиб ўтамиз, бу шахслар Швейтсария ва Европа Иттифоқининг санкциялар рўйхатида қолмоқда.
