Россия Президенти Владимир Путин ҳали ҳокимият тепасига келмасдан аввал, 1994 йилда Қрим, Шарқий Украина ҳамда Шимолий Қозоғистон ҳудудларини Россиянинг ажралмас қисми деб атаган. Бу ҳақда Германия Ташқи ишлар вазирлиги архив ҳужжатларига таяниб, Германиянинг машҳур Der Spiegel журнали хабар берди.
Манбага кўра, 1994 йилнинг биринчи ярмида тузилган ҳужжатларда Германиянинг Санкт-Петербургдаги бош консули Эберхард фон Путткамер томонидан ёзилган эслатма мавжуд. Унда Путиннинг қуйидаги сўзлари келтирилади:
“Қрим, Шарқий Украина ва Шимолий Қозоғистон — энг камида мана шу ҳудудлар — Россия учун ҳеч қачон чет эл бўлмаган, улар доимо Россиянинг таркибий қисми бўлган. Ҳеч бир рус бу ерлар қандай қилиб бошқа давлатга айланганини тушунолмайди”, – дея иқтибос келтиради германиялик дипломат.
Путин, шунингдек, русларнинг миллий ҳиссиётлари ҳақида гапириб, Ғарб мамлакатлари Россиянинг ҳаракатларини “империализмнинг қайтиши” деб баҳолаётган бўлса-да, бу уларнинг нотўғри ахборотга асосланганини билдирган.
“Бу оддийгина Россиянинг ўз манфаатларини ўзга нуқтаи назардан англашидир, холос. Буни Ғарб тушунмаяпти”, — деган эди Путин, дипломатнинг ёзишича.
Эслатиб ўтамиз, 1994 йилда Путин Санкт-Петербург шаҳар ҳокимлигида, мер Анатолий Собчак раҳбарлигида муҳим лавозимларда ишлаган. Собчак Ғарб билан илиқ алоқаларни йўлга қўйган бўлса-да, Украина ҳукуматини миллатчиликда айблаган ва Қрим Россияга қарашли бўлиши кераклигини таъкидлаган эди.
Маълумот учун, Германиянинг собиқ бош консули Эберхард фон Путткамер 2019 йилда вафот этган.
Германия дипломатик архивларида 1994 йилда Путин томонидан айтилган даъволи баёнотлар илк бор ошкор қилинди.
