Рақобат қўмитаси қимор ўйинларига оид реклама билан боғлиқ қонунбузарлик ҳолатлари бўйича навбатдаги чора кўрилди. Маълум қилинишича, ижтимоий тармоқларда кенг аудиторияга эга бўлган икки блогер саҳифаларида Melbet букмекерлик хизматларини реклама қилгани аниқланган.
Гап Шамсиддинов Амирхон (amirxon_uzbek) ва Илёсов Дониёр (donik_krash) ҳақида кетмоқда. Улар саҳна кўринишлари орқали тайёрланган видеороликларда қимор ўйинларини оммалаштирган.
Мазкур ҳолат юзасидан блогерларга нисбатан маъмурий ишлар қўзғатилиб, тегишли ҳужжатлар судга юборилган.
Эслатиб ўтамиз, Ўзбекистон қонунчилигига кўра, қимор ўйинлари ва таваккалчиликка асосланган бошқа хизматларни реклама қилиш тақиқланади. Бу каби ҳолатлар аниқланса, жавобгарликка тортиш белгиланган.
Аввалроқ ҳам Melbet’ни тарғиб қилган 4 нафар блогер судга берилгани ҳақида хабар берилган эди. Рақобат қўмитаси 2024–2025 йилларнинг дастлабки даврида 185 та шундай ноқонуний реклама ҳолатини аниқлаган.
