Россия Давлат думасига мигрантлар учун мактаб таълимини пулли қилиш ва рус тилини билиш бўйича бепул тест топшириш имкониятлари сонини чеклаш юзасидан қонун лойиҳаси киритилди. Бу ҳақда РБК хабар берди.
Хабар беришларича, Россияда мигрант болалар учун мактабларни пулли қилиш бўйича қонун лойиҳаси тайёрланган.
Таъкидланишича, 2025 йилда Россия мактабларида мигрантларнинг фарзандлари сони ошгани сабабли 900 мингдан ортиқ ўқувчилар учун жой етишмаган. Қонун лойиҳаси бюджет маблағларини тежаш, ўқитувчиларга қўшимча тўловлар, ҳамда чет элда рус тилини ўрганишга қизиқишни оширишга хизмат қилади.
Шунингдек, ушбу ташаббусга айрим депутатлар кескин қарши чиқмоқда. Таълим бўйича қўмита аъзоси Анатолий Вассерман “Подъём” нашрига берган интервьюсида бу ғоя мигрант болаларни ҳуқуқий майдондан чиқариб, уларни жамият назоратидан ташқарида қолдириши мумкинлигини айтган.
Ушбу қонун лойиҳаси илгари ҳам муҳокама қилинган, аммо биринчи ўқишда рад этилиб, қайта ишлашга юборилган эди.
