Telegram 2025 йилда ҳозиргача жами 20,9 миллиондан ортиқ канал ва гуруҳни ўчириб ташлади. Бу мессенжер тарихидаги энг катта тозалаш жараёни бўлди. Компания расмий сайтида ёзилишича, айниқса 27 июль куни рекорд даражадаги – 402 мингдан ортиқ канал блокланган. 3 июль куни эса 314 минг канал ёпилган.
Аниқ сабаблар кўрсатилмаган бўлса-да, бу каналлар одатда фойдаланувчи шикоятлари асосида, фирибгарлик, товламачилик ва рухсатсиз шахсий маълумотлар тарқатгани учун ўчириб борилади. Павел Дуровнинг сўзларига кўра, компания сўнгги вақтларда платформани “доксинг” ва ноқонуний контентдан тозалашга алоҳида эътибор қаратмоқда.
Шунингдек, Telegram фойдаланувчилар учун рейтинг тизимини ҳам жорий этмоқда. Бу орқали ҳар бир фойдаланувчи ўз ҳисобининг даражасини билиб боради ва бу кўрсаткич тўлов функциялари ёки қўшимча имкониятларга боғлиқ бўлиши мумкин.
