Япониянинг йирик энергетика компанияси “Tepco” “Фукусима” атом электр станциясидаги радиоактив чиқиндиларни чиқаришга тайёргарлик кўрмоқда. Шу мақсадда одамлар учун ҳануз хавфли бўлган реактор ичига “Spot” ва “Packbot” номли роботлар юборилди. Уларнинг вазифаси – радиация даражасини ўлчаш ва ички ҳолатни видеога олиш.
Япон ОАВ хабарига кўра, олинган тасвирлар бир ой давомида таҳлил қилинади. Шундан сўнг “Tepco” ядровий ёқилғи қолдиқларини қандай чиқаришни белгилаб олади. Компания бундай роботлардан аввал ҳам станция ичкарисини ўрганишда фойдаланган.
Экспертларга кўра, реакторлардан ёқилғи стерженларини олиб чиқиш – бутун жараённинг энг мураккаб босқичи ҳисобланади. Ҳозир станция ичида қарийб 880 тонна ўта хавфли материал мавжуд. Уни чиқариб ташлаш жараёни камида 12–15 йил давом этиши кутилмоқда.
Япония ҳукумати ва “Tepco” АЭСни тўлиқ
демонтаж қилишни 2051 йилгача якунлашни мақсад қилган. Бироқ компания бу муддатни ушлаш мушкул бўлишини тан олмоқда.
Эслатиб ўтамиз, 2011 йилда “Фукусима”га баландлиги 15 метрга яқин цунами уриб, совитиш тизими ишдан чиққан ва учта реакторда актив зона эриб кетган эди. Бу ҳодиса 1986-йилги Чернобилдан кейинги энг йирик ядровий фалокат сифатида тарихда қолган.
