Фарғона, Сурхондарё ҳамда Тошкент вилоятларида коррупцион ҳолатлар фош этилди. Бу ҳақда ДХХ ахборот хизмати Даракчи.узга хабар берди.
Маълум қилинишича, Фарғона вилоятида муқаддам судланган МЧЖ раҳбари ер майдонини харидорга 52 минг АҚШ долларига сотишга келишиб ҳамда вилоят ҳокимлиги ҳузуридаги “Кичик саноат зоналарини бошқариш дирекцияси”да ишловчи таниши орқали унинг номига хусусийлаштириб бериши эвазига 15 минг АҚШ доллари, жами 67 минг АҚШ доллари талаб қилган. Улар 15 минг АҚШ долларини олган пайтида ашёвий далиллар билан ушланган.
Ҳудди шундай Тошкент вилояти Қурилиш ва уй-жой коммунал хўжалиги бош бошқармаси юристконсулти вилоят маъмурий судининг апелляция инстанциясида кўриб чиқилаётган маъмурий ишни мансабдор танишлари орқали Бўка туманида аҳолига хизмат кўрсатувчи МЧЖ таъсисчиси фойдасига ижобий ҳал қилиб бериш эвазига 15 минг АҚШ доллари олган вақтида ашёвий далиллар билан ушланган.
Шунингдек, Сурхондарё вилояти Шўрчи тумани давлат солиқ инспекциясининг солиқ инспектори хизмат мавқеидан фойдаланиб, фуқаро билан ўзаро тил бириктириб, маҳаллий тадбиркорга тегишли бўлган МЧЖнинг 19 млн. 400 минг сўмлик солиқ қарздорлигини сўндириб бериш эвазига 8 млн. сўм талаб қилишган.Инспектор учинчи шахс орқали 6 млн. сўмни олаётган пайтида ноқонуний ҳаракатига чек қўйилган.
Ҳозирда ушбу шахсларга нисбатан Жиноят кодексининг 25,168-моддаси 3-қисми “а”, “в”, 168-моддаси 3-қисми «а» банди ва 28,211-моддаси 2-қисми «б», 168-моддаси 3-қисми “в” банди ва 210-моддаси 2-қисми “в” банди билан жиноят иши қўзғатилиб тергов ҳаракатлари олиб борилмоқда.
