Россия Президенти Владимир Путин 7 октябрь куни Мудофаа вазирлиги раҳбарияти билан ўтказилган йиғилишда 2025 йил давомида Россия қўшинлари Украинанинг бор-йўғи 4900 кв км ҳудуди ва 212 аҳоли пунктини эгаллаганини маълум қилди. Бу Украина умумий ҳудудининг 1 фоизига ҳам етмайди.
Украина нашрлари ҳам бу кўрсаткични тасдиқлаб, Россия сўнгги уч йил ичида фақат 5842 кв км ҳудудни босиб олганини таъкидламоқда. Уруш бошидан бери босиб олинган умумий ҳудуд эса 108 минг кв кмдан ортиқ.
Путин тилга олган ютуқлар Донетск ва Луганск вилоятлари майдони билан солиштирилганда анча кичик. Украина армияси ҳозирда Донетск вилоятининг 30 фоизини, яъни қарийб 8000 кв кмни назорат қилмоқда.
Украина Президенти Владимир Зеленский Россия фронтда катта натижаларга эриша олмаётганини қайд этган. Аввалроқ эса АҚШ Украинага разведка маълумотлари орқали Россия ҳудудининг ичкарисига зарбалар йўллашда ёрдам кўрсатиши маълум қилинган.
