Президент Шавкат Мирзиёев Янги Тошкент ҳудудида барпо этилаётган замонавий энергетика объектлари фаолияти билан танишди. Ушбу ҳудудда шаҳарни марказлашган иситиш ва совитиш билан таъминлашга мўлжалланган Тригенерация технологиясига асосланган станция қурилиши жадал давом этмоқда.
Мазкур технология энергиядан икки баробаргача тежамкор фойдаланиш имконини беради. Биринчи босқичда иссиқлик учун 75 мегаватт, совитиш тизими учун 100 мегаватт қувват яратилади, шунингдек, 17 мегаватт қўшимча электр энергияси ишлаб чиқарилади.
Давлат раҳбари Янги Тошкентда қурилаётган илк нимстансияда ҳам бўлиб, у ердаги ишлар билан танишди. Қуввати 100 мегаватт бўлган ушбу иншоот Хитойнинг “Haocheng Industry Group Limited” компанияси иштирокида давлат-хусусий шериклик асосида амалга оширилмоқда.
Қайд этилишича, бу Ўзбекистондаги биринчи ёпиқ турдаги нимстансия бўлиб, у анъанавий очиқ иншоотларга нисбатан кам майдон эгаллайди, шовқин даражаси паст ва шаҳар меъморий қиёфасига мос ҳисобланади.
Президент объектларнинг техник ва иқтисодий самарадорлиги ҳамда Янги Тошкент учун стратегик аҳамиятини алоҳида таъкидлаб, лойиҳани келгусида янада сифатли амалга ошириш бўйича кўрсатмалар берди.
