Сўнгги кунларда ижтимоий тармоқларда Россияда ОМОН ходимлари томонидан Ўзбекистон фуқароси ўлдирилгани ҳақидаги хабарлар кенг муҳокамага сабаб бўлди. Мазкур ҳолат юзасидан Ўзбекистон Ташқи ишлар вазирлиги расмий баёнот бериб, воқеа тафсилотлари ўрганилаётганини маълум қилди.
Ҳолатга “Миллий тикланиш” демократик партияси раиси Алишер Қодиров ҳам муносабат билдирди. У ижтимоий тармоқлардаги саҳифасида Россиядаги вазият Марказий Осиё фуқаролари учун тобора хавфли тус олаётганини таъкидлади.
“Ишонинг, вазият ой саин фақат ёмонлашади. Россия махсус хизматлари Марказий Осиёликларни келажакда юз бериши мумкин бўлган нотинчликларнинг фаол иштирокчиси сифатида кўрмоқда. Шу сабабли улардан келадиган меҳнат фойдасидан аллақачон воз кечилган”, — деб ёзди Қодиров.
Шунингдек, у Ўзбекистон фуқароларига мурожаат қилиб, Россияга боришдан тийилиш ва имкон қадар тезроқ у ердан қайтишни тавсия қилди.
“Ақлингизни ишлатинг, Россиядан тезроқ кетинг. Ҳеч қандай даромад ота-онангиз ва фарзандларингизнинг кўз ёшига арзимайди”, — дея ёзади у.
Ўзбекистон Ташқи ишлар вазирлиги берган расмий изоҳда Россиянинг Хабаровск шаҳрида Ўзбекистон фуқаросининг вафоти билан боғлиқ ҳолат мамлакатнинг Владивостокдаги Бош консулхонаси ва Миграция агентлиги томонидан назоратга олингани билдирилди.
“Бош консулхона марҳумнинг яқинлари билан доимий алоқада бўлиб, уларга зарур консуллик ва амалий ёрдам кўрсатмоқда. Фуқаронинг жасадини Ватанга қайтариш бўйича тегишли ишлар олиб борилмоқда”, — дейилади вазирлик ахборотида.
Шунингдек, ҳодиса юзасидан Ўзбекистон Бош консулхонаси томонидан Хабаровск ўлкаси прокуратураси, тергов бошқармаси ҳамда Россия ТИВнинг ҳудудий ваколатхоналарига расмий ноталар юборилиб, ҳолатни ҳар томонлама, холис ва қонуний тартибда ўрганиш сўралгани қайд этилди.
ТИВ баёнотида Ўзбекистон дипломатлари хорижда бўлиб турган ҳар бир фуқаронинг ҳуқуқ ва манфаатларини ҳимоя қилишни устувор вазифа деб билиши алоҳида таъкидланган.
