Суҳбат аввалида давлат раҳбарининг жорий йил январь ойида Анқарага амалга оширган расмий ташрифи Ўзбекистон ва Туркия ўртасидаги кенг қамровли стратегик шериклик муносабатларини янги босқичга олиб чиққанлиги таъкидланди.
Томонлар олий даражада эришилган келишувлар ижроси юзасидан фаол мулоқотлар давом этаётганини қайд этди. Шунингдек, вазирлик ва идоралар ўртасида янги ҳамкорлик тизими йўлга қўйилгани натижасида икки мамлакат алоқалари изчил ривожланаётгани айтилди.
Маълум қилинишича, йил бошидан бери ўзаро товар айирбошлаш ҳажми, қўшма корхоналар сони ва авиақатновлар жадал ошмоқда. Турк компаниялари иштирокида йирик инвестиция лойиҳалари ҳам амалга оширилмоқда.
Учрашувда Ўзбекистон ва Туркия етакчилари халқаро ҳамда минтақавий аҳамиятга эга долзарб масалалар юзасидан ҳам фикр алмашди.
