Ўзбекистон сунъий интеллектдан фойдаланиш даражаси паст давлатлар қаторида қайд этилди
"Microsoft" компаниясининг Global AI Diffusion Report ҳисоботига кўра, 2026 йилнинг биринчи чорагида Ўзбекистон аҳолисининг атиги 7,2 фоизи генератив сунъий интеллект технологияларидан фойдаланган.
Ҳисоботда айтилишича, бу кўрсаткич жаҳон ўртача даражасидан анча паст. Шу даврда дунё бўйича генератив сунъий интеллектдан фойдаланувчилар улуши 16,3 фоиздан 17,8 фоизгача ошган.
Марказий Осиё давлатлари орасида энг юқори натижа Қозоғистонда кузатилган — у ерда аҳолининг 15,9 фоизи сунъий интеллект технологияларидан фойдаланади. Қирғизистонда бу кўрсаткич 9,5 фоизни ташкил этган.
Ўзбекистон эса минтақада Қозоғистон ва Қирғизистондан кейинги ўринни эгаллаган. Тожикистон ва Туркманистонда генератив сунъий интеллектдан фойдаланиш даражаси 6,1 фоиз этиб қайд этилган.
Жаҳон рейтингида эса Бирлашган Араб Амирликлари етакчилик қилмоқда. Мамлакатда аҳолининг 70,1 фоизи генератив сунъий интеллектдан фойдаланади. Иккинчи ўринни 63,4 фоиз билан Сингапур эгаллаган. Кучли бешликдан Норвегия, Ирландия ва Франция ҳам жой олган.
"Microsoft" мутахассислари сунъий интеллект технологиялари жорий этилиши дунё бўйлаб нотекис кечаётганини таъкидлаган. Бунга интернет қамрови, электр таъминоти барқарорлиги, рақамли инфратузилма сифати ва аҳолининг рақамли кўникмалари даражаси асосий омил сифатида кўрсатилган.
