Миллий статистика қўмитаси маълумотларига кўра, 2026 йилнинг январь–март ойларида Ўзбекистоннинг экспорт ҳажми 5,8 миллиард АҚШ долларини ташкил этган.
Ҳисоботда қайд этилишича, ушбу даврда Ўзбекистон маҳсулотлари энг кўп экспорт қилинган давлатлар орасида Россия етакчилик қилган. Мамлакатга амалга оширилган экспорт ҳажми 1,1 миллиард долларга етган.
Иккинчи ўриндан Хитой жой олган бўлиб, мазкур давлатга экспорт 641,7 миллион долларга тенг бўлган. Кейинги ўринларда Афғонистон (443,6 млн доллар) ва Франция (405,9 млн доллар) қайд этилган.
Шунингдек, Қозоғистонга 282,8 миллион долларлик, Туркияга 231,6 миллион долларлик маҳсулот экспорт қилинган. Бирлашган Араб Амирликлари ҳиссасига 172,3 миллион доллар, Қирғизистонга 169,9 миллион доллар ва Тожикистонга 140,8 миллион долларлик экспорт тўғри келган.
ТОП-10ликни Хитойнинг махсус маъмурий ҳудуди ҳисобланган Гонконг якунлаб берган. Ушбу ҳудудга экспорт ҳажми 127,1 миллион долларни ташкил этган.
Мутахассислар фикрича, мазкур кўрсаткичлар Ўзбекистон маҳсулотларининг нафақат қўшни давлатлар, балки Европа ва Осиё бозорларида ҳам талаб юқори эканини кўрсатади.
