Ўзбекистонда маданият ва санъат соҳасини қўллаб-қувватлаш бўйича кенг кўламли янги чора-тадбирлар жорий этилади. Бу ҳақда бугун, 1 июнь куни Президент иштирокида ўтказилган йиғилишда маълум қилинди.
Йиғилишда ҳозирги кунда ахборот майдони асосан рақамли платформаларга кўчаётгани қайд этилиб, ёт ғояларга қарши маънавий иммунитетни кучайтиришда ижодкор ва зиёлиларнинг интернетдаги фаоллигини ошириш муҳимлиги таъкидланди. Шу муносабат билан янги ташкил этилаётган 21 та ижодий бирлашмага йил давомида камида тўрт марта танлов ўтказиш тавсия этилди.
Аҳолининг маданият ва санъатга қизиқишини ошириш мақсадида ҳар йили 500 минг нафар ўқитувчи, шифокор, давлат хизматчиси, фаол ўқувчи ва талабага, шунингдек, 100 минг эҳтиёжманд оила ҳамда ногиронлиги бўлган болаларга театр, кино ва концертларга бепул ваучер берилади.
1 июлдан бошлаб ҳар бир туман ва маҳаллада ўтказиладиган концерт-томошалар харажатининг 20 фоизгача қисми давлат бюджети ҳисобидан қоплаб берилади.
Шунингдек, концерт-томоша фаолияти, хусусий театрлар, кинематография, болалар контенти ҳамда маданият ва санъат соҳасидаги хусусий таълим муассасалари қўшилган қиймат солиғи, фойда солиғи, айланма солиғи, ер солиғи, мол-мулк солиғи ва даромад солиғидан озод қилинади. Адабиёт, маданият ва санъатни қўллаб-қувватлаш учун ажратиладиган ҳомийлик маблағлари ҳам солиққа тортилмайди.
Вилоят ҳокимликлари ҳузурида алоҳида дирекциялар ташкил этилади. Улар концерт заллари, театрлар ва маданият саройларидан самарали фойдаланиш ҳамда ҳар куни маданий тадбирлар ўтказилишини таъминлаш учун масъул бўлади.
Йиғилишда бир қатор театрларни модернизация қилиш ишлари бошлангани маълум қилинди. Хусусан, Миллий қўғирчоқ театри, Муқимий номидаги Ўзбекистон давлат мусиқали театри ва Ёшлар театрини янгилаш бўйича ишлар бошлаб юборилган.
Аввал Алишер Навоий номидаги Давлат академик катта театрига берилган мустақил бошқарув тажрибаси ўзини оқлагани қайд этилиб, эндиликда бу амалиёт Муқимий театри, Бердақ номидаги Қорақалпоқ давлат академик мусиқали театри ҳамда Миллий қўғирчоқ театрида ҳам жорий этилади.
1 сентябрдан хусусий театрлар ва театр-студиялари учун янги қўллаб-қувватлаш тизими ишга тушади. Унга кўра, ҳар йили 50 та саҳна асарини яратиш харажатлари давлат томонидан қоплаб берилади. Давлат маданият объектлари уларга бепул ажратилади. Агар хусусий бинодан фойдаланилса, ижара харажатининг ойига 20 миллион сўмгача қисми бюджет ҳисобидан тўланади.
Шунингдек, давлат ва хусусий театрлар сотилган ҳар бир чипта учун қўшимча равишда 10 минг сўмдан гонорар олади. Агар спектакль ҳудудларда намойиш этилса, бу миқдор 20 минг сўмни ташкил қилади.
Йиғилишда кино соҳасини ривожлантириш масалаларига ҳам алоҳида эътибор қаратилди. Яқинда Франциянинг Канн шаҳрида ўтказилган инклюзив фильмлар халқаро фестивалида Гран-прини қўлга киритган бухоролик ёш режиссёрлар Суҳроб Қодиров ва Дилшод Усмоновга ижодини давом эттириши учун 1 миллиард сўмлик ваучер ажратилади.
Шу билан бирга, мамлакатда ҳар йили халқаро фестиваллар даражасида эътироф этиладиган камида 5–10 та сифатли фильм яратиш вазифаси белгиланди.
Йиғилиш якунида "Ўзбекфильм"га миллий мақом берилиб, уни маҳаллий ва халқаро кино индустриясига хизмат кўрсатадиган марказий киноконцернга айлантириш режалаштирилаётгани маълум қилинди. Миллий фильмларни халқаро бозорларга олиб чиқиш мақсадида глобал кино платформалари билан ҳамкорлик кучайтирилади.
