2026 йилнинг дастлабки тўрт ойида Ўзбекистонда табиий газ ва нефть қазиб чиқариш ҳажми камайиб, энергия ресурслари импорти сезиларли даражада ошди.
Президент ҳузуридаги Статистика агентлиги маълумотларига кўра, январь–апрель ойларида мамлакатда 12,6 миллиард куб метр табиий газ қазиб олинган. Бу ўтган йилнинг шу давридаги 15 миллиард куб метр кўрсаткичдан анча кам.
Шунингдек, ҳисобот даврида 209 минг тонна нефть ва 319,3 минг тонна газ конденсати ишлаб чиқарилган. Ҳар икки кўрсаткич ҳам ўтган йилга нисбатан пасайган.
Маҳаллий ишлаб чиқариш қисқариши фонида газ импорти кескин ошган. Тўрт ой давомида табиий газ хариди учун 508,3 миллион доллар сарфланган бўлиб, бу ўтган йилнинг мос даврига нисбатан 3,3 баробар кўпдир.
Айни пайтда газ экспорти ҳам қисқариб, 129,4 миллион долларни ташкил этган. Бу ўтган йилги кўрсаткичдан 70,3 миллион долларга кам.
Нефть ва нефть маҳсулотлари импорти учун эса жами 821,5 миллион доллар сарфланган. Унинг 327,1 миллион доллари автомобиль бензини хариди ҳиссасига тўғри келади.
Шу билан бирга, Ўзбекистоннинг нефть ва нефть маҳсулотлари экспортидан олган даромади ҳисобот даврида 234,3 миллион долларни ташкил этган.
Аввалроқ 2026 йилнинг биринчи чорагида табиий газ қазиб чиқариш ҳажми ўтган йилнинг шу даврига нисбатан 15 фоизга қисқаргани хабар қилинган эди. Март ойида 2,7 миллиард куб метр, биринчи чорак якунларига кўра эса жами 9,6 миллиард куб метр табиий газ қазиб олинган.
