Сурхондарё вилоятининг Шеробод туманида ноёб патология билан туғилган чақалоқ Самарқанд вилояти Болалар кўп тармоқли тиббиёт марказида жарроҳлик амалиётини бошдан кечирди. Бу ҳақда Самарқанд вилояти Соғлиқни сақлаш бошқармаси бошлиғи Суҳроб Зайниев Darakchi.uz'га маълум қилди.
Ижтимоий тармоқларда тўрт оёқли чақалоқ туғилгани ҳақидаги тасвирлар кенг тарқалгач, ҳолат юзасидан расмий маълумот берилди.
Мутахассислар маълум қилишича, чақалоқ сиам эгизакларига хос ноёб патология билан туғилган. Ҳомиланинг иккинчи қисми тўлиқ шаклланмай қолган бўлиб, чала ривожланган эмбрионда фақат тананинг пастки қисми шаклланган.
Самарқанд вилояти Болалар кўп тармоқли тиббиёт маркази бош шифокорининг даволаш ишлари бўйича ўринбосари, жарроҳ Дилшод Раҳмоновнинг айтишича, чақалоқ 28 апрель куни Шеробод туманида дунёга келган ва 29 апрель куни Самарқандга олиб келинган.
Қайд этилишича, чақалоқнинг икки қўшимча оёғи ва ортиқча жинсий аъзоси бўлган. Шунингдек, унда орқа чиқарув тешиги умуман шаклланмагани аниқланган.
Шифокорлар дастлаб чақалоқнинг ҳаётини сақлаб қолиш мақсадида унинг ичагини қорин қисми орқали ташқи томонга чиқаришган. 13 май куни ўтказилган иккинчи жарроҳлик амалиёти давомида ортиқча оёқлар олиб ташланган.
Айни пайтда чақалоқда иккита сийдик пуфаги сақланиб қолган. Шунингдек, икки буйракдан ҳар бири алоҳида канал орқали сийдик пуфагига улангани маълум қилинди.
Шифокорлар келгусида ортиқча сийдик пуфаги ва жинсий аъзони олиб ташлаш, шунингдек, сунъий орқа чиқарув тешиги шакллантириш бўйича қўшимча жарроҳлик амалиётлари ўтказилишини билдирган.
Мутахассисларга кўра, бундай оғир патология билан туғилган чақалоқларнинг яшаб кетиши жуда қийин ҳисобланади. Шунга қарамасдан, шифокорлар унинг ҳаётини сақлаб қолиш учун барча имкониятларни ишга солган.
Маълум бўлишича, чақалоқнинг онаси ҳомиладорликнинг 26 ва 36 ҳафталигида скрининг текширувларидан ўтган. Бироқ текширувлар давомида ҳомиладаги нуқсон аниқланмаган.
Шеробод тумани кўп тармоқли марказий поликлиникаси бошлиғи Шерзод Эшқобилов скрининг текширувини ўтказган тиббиёт ходими текширув жараёнида эътиборсизликка йўл қўйганини тан олган.
Ҳозирда чақалоқнинг аҳволи қониқарли бўлиб, у шифокорлар назорати остида қолмоқда.
