Ўзбекистон Республикаси Президенти Шавкат Мирзиёевнинг таклифига биноан Германия Федератив Республикаси Президенти Франк-Вальтер Штайнмайер рафиқаси ҳамроҳлигида 17–18 июнь кунлари расмий ташриф билан Ўзбекистонда бўлади. Бу ҳақда Президент матбуот хизмати хабар берди.
Маълум қилинишича, ташриф дастури доирасида давлат раҳбарларининг тор ва кенгайтирилган таркибдаги музокаралари бўлиб ўтади. Учрашувларда Ўзбекистон ва Германия ўртасидаги кўп қиррали муносабатларни янада ривожлантиришнинг истиқболли йўналишлари муҳокама қилинади.
Томонлар савдо-иқтисодий ҳамкорликни кенгайтириш, саноат кооперациясини чуқурлаштириш, энергетика ва “яшил” технологиялар соҳасидаги алоқаларни мустаҳкамлаш, транспорт ва логистика, фармацевтика, кимё саноати ҳамда қишлоқ хўжалиги соҳаларида янги лойиҳаларни амалга ошириш масалаларига алоҳида эътибор қаратади.
Шунингдек, таълим ва гуманитар алмашинувларни фаоллаштириш, маданий ҳамкорликни ривожлантириш ҳам кун тартибидан ўрин олган.
Музокаралар чоғида халқаро ва минтақавий аҳамиятга молик долзарб масалалар юзасидан ҳам фикр алмашиш режалаштирилган.
Ташриф якунлари бўйича бир қатор янги қўшма лойиҳа ва дастурларни ишга тушириш, шунингдек, Ўзбекистон ва Германия ўртасидаги ўзаро манфаатли ҳамкорликни янада ривожлантиришга хизмат қиладиган ҳужжатлар тўпламини қабул қилиш кўзда тутилган.
