Маълум қилинишича, 21 июнь куни Янги Андижон шаҳрида “Янги Ўзбекистонни ёшлар қуради” шиори остида гала-концерт бўлиб ўтган. Тадбир 30 июнь — Ёшлар куни муносабати билан ташкил этилган.
Концерт дастурида бир қатор санъаткорлар ва шоу-бизнес вакиллари иштирок этган. Тадбирга минглаб ёшлар ташриф буюрган. Форум доирасида Андижон вилояти ҳокими Шуҳрат Абдураҳмонов ҳам қатнашиб, ёшларга табрик йўллаган.
Шунингдек, МДҲ давлатларида “Дом-2” реалити-шоуси орқали танилган россиялик телебошловчи ва блогер Виктория Боня ҳам тадбир меҳмонларидан бири бўлган. У концерт давомида саҳнага чиқиб, йиғилганлар билан мулоқот қилган.
Тадбирдан сўнг вилоят ҳокими Виктория Боняга гул тақдим этган ва улар биргаликда суратга тушган. Кейинчалик блогер мазкур суратни ўзининг Instagram саҳифасига жойлаштирган.
“Ўзбекистонда бизни жуда самимий кутиб олишмоқда. Таклиф ва гуллар учун Андижон вилояти ҳокими Шуҳратбек Абдураҳмоновга катта раҳмат”, деб ёзган Виктория Боня ўз пости изоҳида.
