Исроил ҳарбийлари томонидан ҳибсга олинган ғазолик эркакнинг қийноққа солингани акс этган сурат ижтимоий тармоқларда тарқалиши ортидан Исроил расмийлари хизмат текширувини бошлади. Бу ҳақда Al Jazeera хабар берди.
Тарқалган суратда кўзи боғланган, қўллари ва танаси маҳкам боғлаб қўйилган эркак каравотга юзтубан ётқизилган ҳолда тасвирланган. Исроил армияси суратнинг ҳақиқийлигини тан олган ва ундаги ҳолат ҳарбий хизматнинг қадриятлари ҳамда меъёрларига зид эканини билдирган.
Шу билан бирга, Исроил томони ҳозирча суратдаги шахснинг кимлиги, қаерда сақланаётгани ва қайси ҳарбий бўлинмага алоқадор экани ҳақида маълумот бермаган.
Маълум қилинишича, сурат Instagram ижтимоий тармоғига иброний тилидаги «Хайрли тонг» деган ёзув билан жойланган. Кейинчалик эса мазкур аккаунт ўчириб ташланган.
Исроил армияси ҳолат юзасидан суриштирув ўтказилаётганини, айбдорлар аниқланса, уларга нисбатан тегишли чоралар кўрилишини маълум қилди.
Суратни кўрган ғазолик Абу Нассар ундаги эркак ўзининг ўғли Усама эканини айтган.
«Мен ўғлимнинг танасидаги ҳар бир белгини биламан. Унинг чап оёғида шиш ва чандиқ бор эди. Суратдаги эркакда ҳам худди шу белги бор», деган у.
Оиланинг маълум қилишича, Усама жорий йилнинг март ойида Исроил ва ҲАМАС ўртасидаги ўт очишни тўхтатиш келишуви амал қилган даврда «Сариқ чизиқ» деб аталувчи ҳудуд яқинида ҳибсга олинган. У қўлга олинган пайтда унинг 1,5 ёшли фарзанди ҳам ёнида бўлган. Кейинчалик бола озод қилинган.
Яқинларининг таъкидлашича, гўдакнинг оёқларида сигарет куйдирилганига ўхшаш излар бўлган. Бироқ Исроил армияси бу иддаоларни рад этган.
Расмий баёнотга кўра, боланинг оёғидаги жароҳат излари аскарлар Усамани тақиқланган ҳудудга яқинлашишдан тўхтатиш мақсадида ҳавога эмас, огоҳлантириш учун отган ўқлар оқибатида юзага келган.
