4 октябрь куни Centrum Air авиакомпаниясининг C6 316 Истанбул–Фарғона рейсида учган йўловчиларнинг 99 та багажи Истанбулда қолиб кетди. Бу ҳақда ижтимоий тармоқларда йўловчиларнинг мурожаатлари тарқалди.
Авиакомпания маълум қилишича, ҳаво кемасига юк ортишда парвозлар хавфсизлиги талабларидан келиб чиқиб, эксплуатацион чекловлар жорий этилган. Шу сабабли айрим багажларни олиб кетиш имкони бўлмаган.
Centrum Air юзага келган ноқулайлик учун йўловчилардан узр сўраб, багажларни имкон қадар тезроқ етказиб бериш чоралари кўрилаётганини билдирди.
Дастлабки маълумотларга кўра, қолиб кетган багажлар 5 октябрь куни соат 22:00 да Фарғона аэропортига етказилиши режалаштирилган.
Авиакомпания йўловчилардан багаж биркаларини сақлаб қўйишни сўраган. Масала юзасидан Фарғона аэропортининг багаж бўлимига мурожаат қилиш мумкин.
