НАТО Бош котиби Марк Рютте АҚШнинг Эронга қарши амалга оширган сўнгги ҳарбий зарбаларини оқлаб, уларни “мутлақо зарур чора” деб баҳолади. Бу ҳақда у бугун, 8 июль куни Туркия пойтахти Анқара шаҳрида ўтаётган НАТО саммити доирасида журналистлар билан мулоқот чоғида маълум қилди.
Рюттенинг бу баёноти АҚШ томонидан 7 июль куни Эронга қарши янги ҳарбий ҳужумлар амалга оширилгани, шунингдек, Ҳормуз бўғозида учта танкерга снарядлар билан ҳужум қилинганидан кейин Вашингтоннинг Теҳронга нефть сотишга рухсат берувчи лицензияни бекор қилгани ортидан янгради. Бу воқеалар аввалдан ҳам беқарор бўлиб турган ўт очишни тўхтатиш келишувига қўшимча босим ўтказган.
"Агар ўт очишни тўхтатиш тўғрисидаги келишув мавжуд бўлса ва Эрон уни амалда бузган бўлса, АҚШнинг қатъий жавоб қайтариши мутлақо зарур", деди НАТО Бош котиби.
Унинг таъкидлашича, АҚШнинг НАТО олдидаги мажбуриятлари ва альянсга содиқлиги борасида ҳеч қандай шубҳа бўлиши мумкин эмас. Рютте НАТО нафақат Европа давлатлари, балки АҚШ хавфсизлигини таъминлашда ҳам муҳим ўрин тутишини қайд этди.
Шу билан бирга, у Европа давлатлари ва Канаданинг ҳам мудофаа харажатларини ошириши лозимлигини таъкидлади.
"Европаликлар ва канадаликлар ҳам мудофаа харажатларини АҚШ даражасига етказиши кутилмоқда. Менимча, бу мутлақо адолатли талаб", деди у.
Марк Рютте, шунингдек, НАТО мамлакатларининг мудофаа соҳасидаги харажатларни кўпайтиришга тайёрлиги сиёсий жиҳатдан муҳим аҳамиятга эга эканини таъкидлаб, бу ҳолатни АҚШ Президенти Дональд Трамп учун ютуқ, Россия Президенти Владимир Путин учун эса мағлубият деб баҳолади.
«Бугунги энг яхши янгилик шуки, бу катта ютуқдир. Бу Путин учун мағлубият, Президент Трамп учун эса ғалаба, чунки европаликлар ва канадаликлар айнан шу йўлдан бормоқда», деди НАТО Бош котиби.
