10 июль куни Багама оролларида кичик йўловчи самолёти ҳалокатга учраши оқибатида бортда бўлган барча 10 киши ҳалок бўлди. Бу ҳақда "New 24" хабар берди.
Маълум қилинишича, Cessna 402C Flamingo Air самолёти Нассаудаги Lynden Pindling халқаро аэропортидан Сан-Андрос оролига парвоз қилганидан кўп ўтмай қулаган. Учувчи ҳалокатдан олдин самолётда техник ёки бошқа муаммо юзага келганини маълум қилган.
Ижтимоий тармоқларда тарқалган видеоларда Шимолий Андрос оролида самолёт парчалари сочилиб ётгани ва айрим қисмларидан тутун чиқаётгани акс этган.
Дастлаб бир нафар йўловчи тирик қолгани ҳақида хабарлар тарқалган эди. Аммо у кейинчалик олган жароҳатлари оқибатида вафот этган. Ҳозирда ҳалок бўлганларнинг шахсига аниқлик киритилмоқда.
Ҳодиса юзасидан тергов бошланган. Шунингдек, Багама ҳукумати эҳтиёт чораси сифатида Flamingo Air авиакомпаниясининг барча парвозларини вақтинча тўхтатди.
Қайд этилишича, ҳалокатдан бир неча соат аввал ушбу авиакомпанияга тегишли яна бир самолёт техник носозлик сабаб Нассау аэропортига қайтишга мажбур бўлган. Ўшанда барча йўловчилар хавфсиз эвакуация қилинган.
