Хитойда шифокорлар ҳомила ҳали она қорнидалигида унинг ўпкасидаги 5 сантиметрлик ўсмани махсус игна ёрдамида йўқ қилди. Бу ҳақда “South China Morning Post” хабар берди.
Қайд этилишича, Шэньчжэнь ва Гонконг шифокорларидан иборат тиббий жамоа 40 ёшли аёлнинг 22 ҳафталик ҳомиласида ўпка тўқимасининг ғайритабиий ўсиши — CPAM аниқланганидан сўнг операция ўтказган.
Текширувлар ҳомиланинг ўнг кўкрак қафасини ўсма тўлиқ эгаллагани ва юрак ҳамда ўпкани қаттиқ сиқиб қўйганини кўрсатган. Шунингдек, қорин бўшлиғида суюқлик тўпланган.
Бундай ҳолатларда одатда суюқликни чиқариш ёки ўсмани озиқлантирувчи асосий қон томирини беркитиш усулларидан фойдаланилади. Бироқ мазкур ўсма майда кисталардан ташкил топгани ва марказий қон томирига эга бўлмагани сабабли бу усуллар самара бермаган.
Шундан сўнг шифокорлар янги усулни қўллаган. Юқори аниқликдаги реал вақт режимида ишловчи УЗИ назорати остида махсус абляция игнаси она қорни, бачадон девори ва ҳомиланинг кўкрак қафаси орқали ўсманинг марказигача киритилган.
Игна орқали микротўлқинли технология ёрдамида ўсма тўқимаси кучли иситилиб, ичкаридан йўқ қилинган. Фаол иситиш жараёни атиги икки дақиқа давом этган. Шу вақт давомида шифокорлар ҳомиланинг соғлом аъзолари зарар кўрмаслигини назорат қилган.
Операциядан уч кун ўтиб, ўсманинг ҳажми сезиларли даражада кичрайган, қорин бўшлиғида тўпланган суюқлик ҳам йўқолган.
Ҳомиладорлик 37 ҳафтага етгач, чақалоқ кесарево кесиш орқали дунёга келган. Унинг вазни 2,9 килограмм бўлиб, туғилганида Апгар шкаласи бўйича 10 балл олган.
Маълум бўлишича, чақалоқ тўрт ойлик бўлганида ҳам соғлом ҳолда ўсган ва унда касаллик аломатлари кузатилмаган. Қўшимча жарроҳлик амалиётига ҳам эҳтиёж бўлмаган.
Шифокорлар мазкур муолажа ҳомиладорлик давридаги тиббий амалиётда янги имкониятларни очиб беришини таъкидлаган.
