Россия ҳукумати Жаҳон соғлиқни сақлаш ташкилотига Сибирнинг Иркутск шаҳрида ўлат ҳолатлари қайд этилмаганини маълум қилди. Бу ҳақда “Рейтер” хабар берди.
Кеча, 6 октябрь куни ЖССТ вакили Кристиан Линдмайер Женевада ўтказилган брифингда ташкилотнинг сўровига Россия ҳукумати томонидан юборилган расмий жавобни ўқиб эшиттирди.
“Россия Федерациясининг Иркутск шаҳрида ушбу хавфли касалликнинг бирорта ҳам ҳолати қайд этилмаган”, дейилади Россия ҳукуматининг жавобида.
Линдмайернинг сўзларига кўра, вафот этган аёл билан мулоқотда бўлган барча шахслар аниқланган ва тиббий назоратга олинган. Ҳозирга қадар уларнинг ҳеч бирида касаллик белгилари кузатилмаган.
ЖССТ Иркутскдаги эпидемиологик вазият билан боғлиқ хавфни “ўртачадан пастгача”, Россиянинг бошқа ҳудудлари учун “паст”, Европа учун эса “жуда паст” деб баҳолаган.
Шунингдек, 6 октябрь куни Россия Федерацияси Истеъмолчилар ҳуқуқларини ҳимоя қилиш ва инсон фаровонлиги соҳасида назорат хизмати — Роспотребнадзорнинг ҳудудий бошқармаси интернетда тарқалган Иркутск вилоятида кучайтирилган санитария-эпидемиологик режим ва қатъий чекловлар жорий этилгани ҳақидаги ҳужжатни рад этди.
Идора бундай қарорлар қабул қилинмаганини билдирди. Қайд этилишича, Иркутск вилояти, Иркутск шаҳри ва Шелеховда эпидемиологик вазият барқарор.
Эслатиб ўтамиз, жорий йилнинг 2 октябрь кунига ўтар кечаси Шелехов туман шифохонасида ўлатга қарши илмий-тадқиқот институтида ишлаган 28 ёшли Дарья Шипилова вафот этган. Айрим оммавий ахборот воситалари унинг ўлими ўпка ўлати билан боғлиқ бўлиши мумкинлигини хабар қилган.
1 октябрь куни шифохонанинг бир нечта бўлимида беморларни қабул қилиш ва чиқариш вақтинча тўхтатилган. Аёл билан мулоқотда бўлган 197 киши тиббий назоратга олинган.
4 октябрь куни Роспотребнадзор Шипиловада келиб чиқиши аниқланмаган ўпка яллиғланиши — ноаниқ этиологияли пневмония аниқланганини маълум қилди. Идора маълумотларига кўра, унинг таҳлилларида касбий фаолияти билан боғлиқ микроорганизмлар топилмаган.
Шунингдек, марҳума билан мулоқотда бўлган шахсларда коронавирус инфекцияси ва риновирус инфекциясининг иккитадан ҳолати аниқланган. Бошқа касаллик қўзғатувчилари топилмаган.
6 октябрь куни Шелехов тумани раҳбарининг ўринбосари Елена Софина “хавфли ташхис” тасдиқланмаганини билдирди. Унинг айтишича, эҳтиёт чораси сифатида карантинга жойлаштирилганларнинг 60 фоизи аллақачон уйига жўнатилган.
Маҳаллий оммавий ахборот воситалари дастлаб санитария чекловлари қарийб 200 кишига таъсир қилганини хабар қилган.
Иркутск вилоятида ўлат тарқалиши мумкинлиги ҳақидаги хабарлар ортидан Марказий Осиё давлатлари Россия билан чегарада санитария назоратини кучайтирди.
Россия билан қуруқликда чегарага эга бўлмаган Ўзбекистон бундай чораларни 3 октябрь куни жорий этди. Кейинчалик Қозоғистон ва Қирғизистон ҳам кучайтирилган санитария-карантин назоратини ўрнатди.
