Францияда узоқ давом этган жазирама иссиқдан кейин кузатилган кучли бўрон ва момақалдироқлар оқибатида камида икки киши ҳалок бўлди. Шунингдек, мамлакат бўйлаб 53 мингдан ортиқ хонадон электр таъминотисиз қолди. Бу ҳақда Франция расмийлари маълум қилди.
Маълум қилинишича, Ҳаут-Вьен департаментининг Сен-Виктюрньен коммунасида дарахт қулаши оқибатида бир аёл ҳалок бўлган. Шунингдек, мамлакат шарқидаги Изер департаментининг Доломьё коммунасида чақмоқ урган устахонада юз берган ёнғин оқибатида бир эркакнинг жасади топилган.
Франциянинг электр тармоқлари оператори "Enedis" маълумотига кўра, бўронлар натижасида 53 мингдан ортиқ хонадонда электр энергияси узилган. Электр таъминотидаги узилишлар асосан мамлакатнинг жануби-шарқидаги Овернь – Рона – Альп ва жануби-ғарбидаги Нувел-Аквитания ҳудудларида қайд этилган.
Синоптиклар айрим ҳудудларда кучли шамол ва дўл кузатилганини маълум қилди. Кейинчалик об-ҳаво шароити яхшилангач, "Метео-Франс" мамлакатнинг жануби-шарқий қисми учун эълон қилинган тўқ сариқ даражадаги хавф даражасини бекор қилди.
Аввалроқ Франциянинг қатор ҳудудларида бир неча кун давомида экстремал иссиқ об-ҳаво ҳукм сурган эди. Синоптиклар ёғингарчилик ва кучли шамоллар юқори ҳароратдан кейин атмосфера фронтларининг кескин алмашинуви оқибатида юзага келганини қайд этмоқда.
