Россиянинг Иркутск вилоятида вабодан вафот этгани айтилган ўлатга қарши институт ходимасида келиб чиқиши номаълум пневмония аниқланган. Бу ҳақда ТАСС маълум қилди.
Роспотребнадзор маълумотига кўра, марҳумадан олинган намуналар кенгайтирилган тарзда текширилган. Тадқиқотлар натижасида унинг касбий фаолияти, жумладан, патоген микроорганизмлар билан ишлаши билан боғлиқ бўлган инфекция қўзғатувчилари аниқланмаган.
Шунингдек, вафот этган ходима билан мулоқотда бўлган шахсларнинг ҳеч бирида инфекцион касаллик билан боғлиқ саломатлик ўзгаришлари кузатилмаган. Институтда патоген микроорганизмлар билан ишлаш жараёнида ҳам авария ёки фавқулодда ҳолатлар қайд этилмаган.
Текширув давомида институт ходимлари орасида икки кишида COVID-19, яна икки кишида эса риновирус инфекцияси аниқланган. Бироқ бошқа инфекцион касалликларнинг қўзғатувчилари, жумладан вабо касаллигини келтириб чиқарувчи инфекцияга оид далиллар топилмаган.
Аввалроқ Россия ОАВ Иркутск вилоятидаги ўлатга қарши институтнинг 27 ёшли ходимаси вабога чалингани гумон қилиниб вафот этгани ҳақида хабар берган эди. Бу хабарлар жамоатчиликда хавотир уйғотган.
Шундан сўнг Ўзбекистонда ҳам эҳтимолий вабо хавфининг олдини олиш мақсадида чегарада санитария-карантин назорати кучайтирилган.
