Apple бозор капитализацияси бўйича Nvidia’ни ортда қолдириб, яна дунёдаги энг қиммат оммавий компанияга айланди. Бу ҳақда Reuters хабар берди.
Маълум қилинишича, Apple’нинг бозор қиймати 4,9 триллион долларга етган. Акциялари бироз арзонлашган Nvidia’нинг капитализацияси эса 4,8 триллион долларни ташкил этган.
Йил бошидан буён Apple акциялари 20 фоиздан ортиқ қимматлашган. Шу даврда Nvidia акциялари ҳам ўсган бўлса-да, уларнинг ўсиш суръати 10 фоиздан кам бўлган.
Reuters таъкидлашича, бу ўзгариш инвесторлар кайфиятидаги муҳим бурилишни англатади. Сармоядорлар энди фақат сунъий интеллект соҳасидаги қисқа муддатли ўсишга эмас, балки барқарор даромад ва мустаҳкам бизнес моделига эга технологик компанияларга ҳам катта қизиқиш билдирмоқда.
BRI Wealth Management инвестициялар бўлими раҳбари Тони Медоуснинг фикрича, Apple сунъий интеллект пойгасида рақобатчиларга нисбатан камроқ сармоя киритаётган бўлса-да, унинг кучли экотизими, пуллик сервислари ва қурилмаларни мунтазам янгилаб бориши компаниянинг молиявий барқарорлигини таъминламоқда. Шу боис инвесторлар Apple акцияларини узоқ муддатли ва ишончли инвестиция сифатида баҳоламоқда.
Apple 2018 йилда бозор қиймати 1 триллион доллардан ошган илк оммавий компания сифатида тарихга кирган эди. 2024 йилда бу кўрсаткич бўйича Nvidia етакчиликни қўлга киритган бўлса, ҳозир Apple яна глобал рейтингда биринчи ўринга қайтди.
