Японияда генетик жиҳатдан ўзгартирилган чўчқалардан олинган буйракларни инсонларга кўчириб ўтказиш бўйича клиник синовлар 2028 йилдан бошланиши режалаштирилмоқда. Бу ҳақда The Japan Times хабар берди.
Мазкур лойиҳа Мэйдзи университети негизида ташкил этилган PorMedTec биотехнологик стартапи томонидан амалга оширилмоқда. Компания АҚШнинг eGenesis биотехнологик фирмаси томонидан яратилган генетик жиҳатдан ўзгартирилган чўчқалардан фойдаланмоқда.
Режага кўра, чўчқалардан олинган буйраклар Саппоро шаҳридаги Хоккайдо университети шифохонаси ҳамда Канагава префектурасида жойлашган Шонан Камакура умумий шифохонасида беморларга кўчириб ўтказилади.
Мутахассислар ҳайвондан инсонга орган кўчириб ўтказиш технологиясини трансплантация учун донор органлар етишмовчилигини камайтиришнинг истиқболли усулларидан бири сифатида баҳоламоқда.
Маълум қилинишича, eGenesis томонидан етиштирилган чўчқаларнинг генларига 69 та ўзгартиш киритилган. Бу орқали инсон иммун тизимининг кўчириб ўтказилган органни рад этиш хавфини камайтириш, шунингдек, ҳайвон вирусларининг инсонга юқиш эҳтимолини пасайтириш мақсад қилинган.
АҚШда ҳозирга қадар ушбу технология асосида тўртта клиник синов ўтказилган. Айрим беморлар операциядан сўнг бир неча ой давомида диализ муолажасига эҳтиёж сезмаган.
Японияда ҳозирда 300 мингдан ортиқ киши буйрак етишмовчилиги сабабли диализ муолажасини олмоқда. Шунингдек, қарийб 15 минг нафар бемор буйрак трансплантациясини кутмоқда.
PorMedTec раҳбари, Мэйдзи университети профессори Хироши Нағашима турлараро трансплантация келажакда самарали тиббий технологияга айланиши учун тадқиқотлар давом эттирилишини билдирган.
Эслатиб ўтамиз, аввалроқ PorMedTec 2027 йилга бориб инсонларга орган кўчириб ўтказиш мақсадида клонланган чўчқаларни етиштириш учун махсус ферма ташкил этишни режалаштираётгани хабар қилинган эди. Клонланган чўчқалар — табиий кўпайиш йўли билан эмас, балки лаборатория шароитида генетик жиҳатдан бир хил нусха сифатида яратилган ҳайвонлардир.
