"Барселона" футбол клубининг "Камп Ноу" стадионида олиб борилаётган реконструкция ишлари вақтида 54 ёшли қурилиш ишчиси ҳалок бўлди. Бу ҳақда ESPN хабар берди.
Клуб тарқатган қисқа баёнотда ишчи кеча иш жойида содир бўлган бахтсиз ҳодиса оқибатида вафот этгани қайд этилди. "Барселона" марҳумнинг оиласи, яқинлари ва ҳамкасбларига ҳамдардлик билдирди.
Каталония полицияси маълумотига кўра, ишчи бошидан олган оғир жароҳатлар оқибатида ҳаётдан кўз юмган. Ҳодисанинг бошқа тафсилотлари ҳозирча очиқланмаган.
"Барселона" 2023 йилда "Камп Ноу" стадионини капитал реконструкция қилиш ишларини бошлаган эди. Қурилиш ишлари давом этаётганига қарамай, стадион ўтган йил ноябрь ойида чекланган миқдордаги томошабинлар учун қисман очилган.
Каталония клуби янги мавсумдаги "Камп Ноу"даги илк уй учрашувини 27 август куни "Атлетик Бильбао"га қарши ўтказади. Бу вақтда реконструкция ишлари ҳали давом этаётган бўлади.
Лойиҳа тўлиқ якунлангач, стадион сиғими 105 минг томошабинга етказилади. Шу тариқа "Камп Ноу" яна Европадаги энг йирик футбол стадионларидан бирига айланади.
