Франция футбол федерацияси афсонавий футболчи ва мураббий Зинедин Зиданни мамлакат миллий терма жамоаси бош мураббийи этиб тайинланганини расман эълон қилди.
Маълум қилинишича, 54 ёшли мутахассис билан 2030 йилги Жаҳон чемпионати якунига қадар амал қиладиган тўрт йиллик шартнома имзоланган.
Зидан 2026 йилги Жаҳон чемпионатидан сўнг терма жамоани тарк этган Дидье Дешамнинг ўрнини эгаллади. Дешам 2012 йилдан бери Францияни бошқариб келган бўлиб, унинг қўл остида жамоа 2018 йилги Жаҳон чемпионати ва 2021 йилги UEFA Миллатлар лигасида бош совринни қўлга киритди. Шунингдек, французлар Евро–2016 ҳамда 2022 йилги Жаҳон чемпионатида финалгача етиб борди.
2026 йилги мундиалда Франция ярим финалда Испанияга 0:2 ҳисобида мағлуб бўлди. Учинчи ўрин учун кечган баҳсда эса Англияга 4:6 ҳисобида имкониятни бой бериб, мусобақани тўртинчи поғонада якунлади.
Маълумот учун, Зинедин Зидан 2021 йил май ойида "Реал Мадрид" бош мураббийлигидан кетганидан бери ҳеч бир жамоада ишламаган эди. У "Қироллик клуби"ни 2016–2018 ва 2019–2021 йилларда бошқариб, уч марта UEFA Чемпионлар лигаси, икки марта Испания чемпионати, икки марта UEFA Суперкубоги, икки марта Испания Суперкубоги ҳамда икки марта FIFA Клублар ўртасидаги жаҳон чемпионати ғолиблигини қўлга киритган.
