Белгин Сарилмишэр 1958 йил 15 июль куни Туркиянинг Мерсин шаҳрида туғилган. У ёшлигидан мусиқага қизиқиб, консерваторияда фортепиано ва виолончель йўналишларида таҳсил олган. Бироқ оилавий ва моддий қийинчиликлар сабаб ўқишини давом эттира олмаган.
1977 йилда Анқарадаги тунги клублардан бирида илк бор саҳнага чиққан Белгин ўз истеъдоди билан томошабинлар эътиборини қозонган. Айнан шу даврда у "Берген" тахаллусини қабул қилиб, профессионал хонандалик фаолиятини бошлаган.
Кейинчалик Адана шаҳрида фаолият юритган пайтида Ҳалис Сербест билан танишган. Улар 1982 йилда турмуш қурган. Аммо никоҳдан сўнг Бергеннинг ҳаёти оғир синовларга дуч келган. Оилавий зўравонлик ва таҳдидларга барҳам бериш мақсадида ажрашишга қарор қилганидан кейин унга нисбатан оғир жиноят содир этилган.
1982 йил 31 октябрь куни ёлланган шахс Бергеннинг юзига азот кислотаси сепган. Оқибатда хонанда оғир жароҳат олган ва бир кўзидан айрилган.
Узоқ даволанишдан кейин Берген яна саҳнага қайтган. 1986 йилда чиққан "Acıların Kadını" ("Дарду аламлар аёли") альбоми миллиондан ортиқ нусхада сотилиб, уни Туркиянинг энг машҳур арабеск хонандаларидан бирига айлантирган. Шундан кейин мухлислар уни айнан шу ном билан атай бошлаган.
Бироқ хонанданинг фожиали қисмати шу билан якунланмаган. 1989 йил 14 август куни Туркиянинг Адана вилояти Позанти туманида собиқ турмуш ўртоғи Ҳалис Сербест томонидан отиб ўлдирилган. Ҳужум вақтида унинг онаси ҳам жароҳат олган.
Қотилликдан сўнг Ҳалис Сербест Германияда қўлга олинган ва 15 йиллик қамоқ жазосига ҳукм қилинган. Кейинчалик жазо муддати қисқартирилган. Бу қарор Туркия жамоатчилиги томонидан кенг танқид қилинган.
Берген Мерсин шаҳрида дафн этилган. Айтишларича, унинг қабри атрофи темир панжара билан ўралган ва олти қулф билан ёпилган. Бунга собиқ эрининг "Сени қабрингда ҳам тинч қўймайман" деган таҳдидлари сабаб бўлгани айтилган. Шундан сўнг хонанданинг онаси қизининг қабрини махсус ҳимоя воситалари билан ўраттирган.
Бугунги кунда ҳам Берген қабри унинг миллионлаб мухлислари томонидан зиёрат қилинади.
Бергеннинг ҳаёти санъатдаги муваффақият, кучли ирода ва оилавий зўравонликнинг оғир оқибатларини акс эттирувчи аянчли қисмат сифатида ёдга олинади. Унинг қўшиқлари ва ҳаёт йўли орадан йиллар ўтса ҳам мухлислари хотирасида яшаб келмоқда.
