Таиланднинг Паттайя шаҳрида Россиянинг Тюмень вилоятидан бўлган ака-сингил — 17 ёшли Роман ва 22 ёшли Диана шафқатсизларча ўлдирилди.
Маҳаллий ОАВ маълумотларига кўра, улар 26 июль куни тунги вақтда мотоциклда уйдан чиқиб кетганидан сўнг бедарак йўқолган.
Маълум қилинишича, ғойиб бўлишидан олдин Диана онасига кимдир уни кузатаётгандек туюлаётганини айтган.
Тергов давомида ҳуқуқни муҳофаза қилувчи органлар аввал судланган Понг исмли шахсга чиққан. Унинг уйи яқинидан ҳалок бўлганларга тегишли мотоцикл кўмилган ҳолда топилган.
Понг ва унинг шериги Камбожа чегараси орқали қочишга уринган вақтда қўлга олинган.
Тергов маълумотларига кўра, гумонланувчилар мотоциклни ўғирлашни режалаштирганини тан олган. Улар Роман қаршилик кўрсатганидан кейин уни отиб ўлдиргани, Дианани эса калтаклаб ҳаётдан маҳрум қилганини билдирган.
Маҳаллий оммавий ахборот воситалари ушбу жиноят яна бир нечта қотиллик билан боғлиқ бўлиши мумкинлигини ёзмоқда. Хабарларга кўра, жабрланувчилар жасадлари кўмилган ҳудуддан яна беш нафар шахснинг жасади топилгани айтилмоқда. Бироқ бу маълумот ҳозирча расман тасдиқлангани йўқ.
Ҳозирча жиноий гуруҳнинг эҳтимолий раҳбари қўлга олинмаган. Тергов ҳаракатлари давом этмоқда.
