Ҳиндистонда тиббиёт олийгоҳларига қабул учун ўтказиладиган "NEET" имтиҳонида саволлар сиздирилгани ортидан юзага келган можаро камида 21 нафар абитуриентнинг ўз жонига қасд қилишига сабаб бўлди. Бу ҳақда "BBC" хабар берди.
Нашр маълум қилишича, ҳалок бўлганлардан бири Аҳмадабод шаҳрида яшаган 17 ёшли Кахаан Пател бўлган. У қайта белгиланган имтиҳонга уч кун қолганда яшаб турган уйининг олтинчи қаватидан сакраб, ҳаётига нуқта қўйган.
Кахааннинг отаси Прашант Пателнинг айтишича, ўғли шифокор бўлишни орзу қилган ва имтиҳонни муваффақиятли топширганига ишонган. Бироқ саволлар сиздирилгани сабабли натижалар бекор қилиниб, қайта имтиҳон белгилангач, у қаттиқ руҳий тушкунликка тушган.
"Менинг айбим нима? Имтиҳонни ҳалол топширган абитуриентларнинг айби нима?" деган саволни у отасига бир неча бор такрорлаган.
Шунга ўхшаш фожиа Ражастан штатида ҳам юз берган. 23 ёшли Прадип Кумар ҳам қайта имтиҳон ўтказилиши ҳақидаги қарордан сўнг ўз жонига қасд қилган. Унинг отаси ўғлининг таълими учун ерини сотиб, банкдан қарз олганини айтган.
Мазкур воқеалардан кейин мамлакат бўйлаб минглаб талабалар норозилик намойишларига чиққан. Улар имтиҳон тизимидаги қонунбузарликлар учун масъулларни жавобгарликка тортишни талаб қилган. Оммавий норозиликлардан сўнг Ҳиндистон таълим вазири Дхармендра Прадхан истеъфога чиққан.
Ҳукумат ҳалок бўлган ёшларнинг оилаларига ҳамдардлик билдириб, амалдаги тартибларга мувофиқ товон пули тўланишини маълум қилган.
