Хитойнинг “Long March 7A” ракета-ташувчиси учирилганидан 85 сония ўтиб портлаб кетди. Ҳодиса кеча, 10 август куни мамлакат жанубидаги Хайнань оролида жойлашган Вэньчан космодромида содир бўлган. Бу ҳақда “Space” хабар берди.
Маълум қилинишича, ракета Пекин вақти билан соат 20:02 атрофида учирилган. У орбитага “Zhongxing-4B” алоқа сунъий йўлдошини олиб чиқиши керак бўлган.
Бироқ учирилганидан атиги 85 сония ўтиб ракета ҳавода портлаган. Ҳодиса биринчи босқич ажралиб чиқишидан олдин содир бўлган ва натижада сунъий йўлдош ҳам йўқ қилинган.
Хитойнинг “Синьхуа” агентлиги парвоз вақтида “фавқулодда вазият” юзага келганини маълум қилди. Ҳозирда портлаш сабабларини аниқлаш бўйича текширув олиб борилмоқда.
Мутахассислар ҳодисага ишлаб чиқаришдаги нуқсон ёки парвозни режалаштиришдаги хатолар сабаб бўлган бўлиши мумкинлигини истисно қилмаяпти. Шунингдек, ракета марказий босқичида қўлланилган YF-100 двигателларида носозлик юзага келган бўлиши эҳтимоли ҳам кўриб чиқилмоқда.
Таҳлилчи Георгий Тришкин ҳодисани “ўта ажабтовур” деб баҳолаган. Унинг таъкидлашича, бундай ҳалокатлар космик пойганинг дастлабки даврида кўпроқ учраган, аммо ҳозирги шароитда, айниқса, “Long March 7A” ракетасининг 18-учирилишида бундай ҳолатнинг юз бериши кутилмаган.
Мутахассисга кўра, агар носозлик YF-100 двигателлари билан боғлиқ бўлиб чиқса, бу Хитойнинг бошқа космик дастурлари ва режалаштирилган парвозларига ҳам таъсир қилиши мумкин. Мазкур двигатель мамлакатдаги бир қатор ракета-ташувчиларда кенг қўлланилади.
Хитой учун бу 2026 йилдаги тўртинчи муваффақиятсиз ракета учирилиши бўлди. 17 январь куни мамлакатда бир кунда иккита учириш муваффақиятсиз якунланган. Апрель ойи бошида эса Хитойнинг қайта фойдаланиладиган Falcon 9 ракетасига рақобатчи сифатида қаралаётган “Tianlong-3” ракета-ташувчисининг синов парвози ҳам ҳалокат билан якунланган.
“Long March 7A” учун эса бу 2020 йил март ойидаги илк парвозидан кейинги иккинчи муваффақиятсиз миссия ҳисобланади. Умуман, ракета шу пайтга қадар 18 марта учирилган.
