Ўзбекистонда содир этилаётган кибержиноятларнинг 90 фоизи чет давлатлардан туриб амалга оширилмоқда. Бу ҳақда Ички ишлар вазири ўринбосари, полковник Рамазон Ашропов аҳолига қилган мурожаатида маълум қилди.
Унинг таъкидлашича, бугунги кунда содир этилаётган деярли ҳар икки жиноятнинг бири ахборот технологиялари орқали амалга оширилмоқда. Хусусан, мамлакатдаги кибержиноятларнинг асосий қисми хориждан туриб, трансчегаравий хусусиятда содир этилмоқда.
Рамазон Ашроповнинг қайд этишича, кибержиноятларга қарши курашишда фақат ҳуқуқни муҳофаза қилувчи органларнинг ҳаракатлари етарли эмас. Чунки жиноятчилар асосан фуқароларнинг соддалиги, бепарволиги ва рақамли саводхонлиги етарли эмаслигидан фойдаланмоқда.
“Очиқ айтиш лозим: бу турдаги жиноятларга қарши курашиш фақатгина ҳуқуқни муҳофаза қилувчи органлар томонидан олиб борилса, кутилган натижага эришиб бўлмайди. Бугун бутун жамиятнинг, жамоатчиликнинг кучи, сизу бизнинг ҳамкорлигимиз керак”, деди вазир ўринбосари.
У фуқароларни кундалик ҳаётда киберхавфсизлик қоидаларига амал қилишга чақирди.
Жумладан:
— ижтимоий тармоқлар орқали келган шубҳали ва номаълум файлларни, айниқса, APK форматдаги файлларни очмаслик ва юклаб олмаслик. Бундай файллар яқин инсондан келган тақдирда ҳам эҳтиёт бўлиш;
— нотаниш рақамлардан қўнғироқ қилиб, ўзини турли идора ходими сифатида таништирган шахсларга ишонмаслик. Телефон орқали ҳеч қачон код ёки пароль сўралмаслигини ёдда тутиш;
— пулни қисқа вақт ичида бир неча баробар кўпайтириб беришни ваъда қилаётган онлайн платформаларга ишонмаслик;
— онлайн савдода сотувчининг ишончлилигига ишонч ҳосил қилмасдан туриб, олдиндан тўлов қилмаслик;
— банк картасининг ПИН-коди ҳамда телефонга келган СМС-кодни ҳеч кимга айтмаслик.
Ички ишлар вазири ўринбосари бу қоидаларни яқинлар, айниқса, кексалар ва болаларга ҳам тушунтириш зарурлигини таъкидлади.
