Словакия, Германия ва Жанубий Кореяга ишга жўнатишни ваъда қилган шахслар фуқаролардан миллионлаб сўм ва минглаб АҚШ долларини олган вақтида қўлга тушди. Улардан бири 6 нафар фуқарони Словакияга ишга жўнатиш учун 145 млн сўм талаб қилган.
Давлат хавфсизлик хизмати, Иқтисодий жиноятларга қарши курашиш департаменти ва ички ишлар органлари ходимлари ҳамкорлигида ўтказилган тезкор тадбирларда хорижга ишга жўнатиш билан боғлиқ фирибгарлик ҳолатларига чек қўйилди.
Тошкент шаҳрида яшовчи, 1985 йилда туғилган, муқаддам судланган шахс Қашқадарё вилоятида яшовчи 6 нафар фуқарони Словакияга ишга жўнатишни ваъда қилиб, бунинг эвазига 145 млн сўм талаб қилган. У олдиндан 85 млн сўмни олган вақтида ашёвий далиллар билан ушланган.
Яна бир ҳолатда Тошкент шаҳрида хорижий давлатларга виза олиш бўйича консалтинг хизматларини кўрсатувчи МЧЖ раҳбари 2002 йилда туғилган фуқаронинг ишончига кириб, уни Германияга ишга жўнатишни ваъда қилган. У виза расмийлаштириш учун 4 минг АҚШ долларини олган вақтида қўлга олинган.
Тошкент вилоятининг Зангиота туманида ҳам шундай ҳолат аниқланган. 1993 йилда туғилган аёл Ангрен шаҳрида яшовчи, 2000 йилда туғилган фуқарони Жанубий Кореяга ишга жўнатишни ваъда қилиб, ундан 5 минг 900 АҚШ долларини олган вақтида ушланган.
Барча ҳолатлар бўйича Жиноят кодексининг 168-моддаси (фирибгарлик) билан жиноят ишлари қўзғатилган. Ҳозирда тергов ҳаракатлари олиб борилмоқда.
