Тошкент вилоятидаги банклардан бирининг минтақавий маркази бўлим бошлиғи 100 минг АҚШ долларини олган вақтида ушланди.
У харидордан жами 4 миллион 250 минг доллар талаб қилган. Эвазига 16,05 гектар ер майдонини сотишни ваъда қилган. Шунингдек, ҳокимлик захирасидаги 4 гектар ерни ҳам расмийлаштириб беришни айтган.
Тезкор тадбир Давлат хавфсизлик хизматининг Тошкент вилояти бўйича бошқармаси томонидан ўтказилган. Унда Бош прокуратура ҳузуридаги Департамент ходимлари ҳам иштирок этган.
Қайд этилишича, гумонланувчи банкнинг минтақавий маркази Маҳалладабай ва давлат дастурлари билан ишлаш бўлими бошлиғи бўлган.
У 2024 йилда Давлат активларини бошқариш агентлигининг ҳудудий бошқармаси томонидан электрон онлайн-аукцион орқали сотилган ер майдонини сотишни ваъда қилган.
Гап Қуйичирчиқ тумани ҳокимлиги балансида бўлган 16,05 гектар ер ҳақида кетмоқда. Мазкур ер чорвачилик мақсадида фойдаланиш учун унинг отасига ижара ҳуқуқи асосида берилган.
Бундан ташқари, ҳокимлик захирасидаги 4 гектар ерни мансабдор танишлари орқали расмийлаштириб беришни ваъда қилган.
Тезкор тадбир вақтида у талаб қилинган пулнинг 100 минг долларини олдиндан олаётганида ашёвий далиллар билан ушланган.
Ҳозирда унга нисбатан жиноят иши қўзғатилган. Тергов ҳаракатлари олиб борилмоқда.
