Португалия миллий терма жамоаси сардори Криштиану Роналду 2026 йилни профессионал футболдаги сўнгги йили бўлиши мумкинлигини маълум қилди. 41 ёшли футболчи бу ҳақда "Vogue" журналига берган интервьюсида айтди.
"Бу менинг футболдаги сўнгги йилим бўлиши мумкин ва мен катта мерос қолдирмоқчиман", деди Роналду.
У футболчилик фаолиятини якунлагандан кейинги ҳаётини ҳам режалаштириб қўйганини айтди. Унинг сўзларига кўра, саёҳат қилиш, кўпроқ дам олиш, падел ўйнаш ва ўз фаолияти давомида эришган ютуқларидан баҳраманд бўлишни истайди.
"Футбол ҳаётингизда катта бўшлиқ қолдириши мумкин. Шунинг учун вақтингизни турли машғулотлар билан тўлдириш керак. Кўпроқ саёҳат қилишни, падел томоша қилиш ва ўйнашни хоҳлайман. Бу спорт менга жуда ёқади", деди португалиялик футболчи.
Роналду профессионал фаолияти давомида "Спортинг", "Манчестер Юнайтед", "Реал Мадрид", "Ювентус" ва "Ал-Наср" клублари шарафини ҳимоя қилган. У 25 йиллик фаолияти давомида беш марта "Олтин тўп" соҳиби бўлган.
Маълумот учун, Роналду катталар футболидаги илк расмий учрашувини 2002 йил 14 август куни "Спортинг" сафида ўтказган. У Лиссабонда "Интер"га қарши Чемпионлар лигаси саралаш босқичи баҳсида иккинчи бўлимда майдонга тушган. Учрашув 0:0 ҳисобида якунланган.
