Қашқадарё ва Самарқанд вилоятларида электр энергиясидан ноқонуний фойдаланиш билан боғлиқ 6 та ҳолат аниқланди. Қоидабузарликлар оқибатида жами 1,86 млрд сўмдан зиёд зарар етказилган. Бу ҳақда Электр энергияси, нефть маҳсулотлари ва газдан фойдаланишни назорат қилиш инспекцияси хабар берди.
Қайд этилишича, Бош прокуратура штаби томонидан Қашқадарё вилоятининг Муборак туманида ўтказилган назорат тадбири давомида "А. Г." МЧЖга қарашли корхона электр тармоғига ўзбошимчалик билан улангани аниқланган. Бунинг натижасида 439 млн сўмлик электр энергиясидан ноқонуний фойдаланилган.
Касби туманида эса якка тартибдаги тадбиркор Ч. С.га қарашли бинода шунга ўхшаш қоидабузарлик аниқланиб, таъминот корхонасига 118 млн сўм зарар етказилгани қайд этилган.
Чироқчи туманидаги "Қ. С. Т." МЧЖга қарашли сув насосларида аниқланган ноқонуний фойдаланиш ҳолати бўйича эса 122 млн сўмлик зарар ҳисобланган.
Самарқанд вилоятида ҳам электр энергиясидан ноқонуний фойдаланиш билан боғлиқ 3 та ҳолат аниқланган.
Хусусан, Самарқанд туманида якка тартибдаги тадбиркор М. С.га қарашли корхона электр тармоғига ўзбошимчалик билан уланган. Оқибатда 524,7 млн сўмлик электр энергиясидан ноқонуний фойдаланилган.
Шу тумандаги "С. А. И." МЧЖга қарашли бинода аниқланган қоидабузарлик натижасида 180 млн сўмлик зарар етказилган.
Булунғур туманида эса якка тартибдаги тадбиркор М. А.га қарашли нотурар бинода электр энергиясидан ноқонуний фойдаланилгани аниқланиб, электр таъминоти корхонасига 477 млн сўм зарар етказилган.
