Қозоғистонда эри билан ширинлик сабаб келиб чиққан жанжалдан сўнг вафот этган ўзбекистонлик Мадина Авезованинг онаси қизининг оилавий ҳаёти ҳақида гапирди. Унинг айтишича, Мадина 17 ёшида ҳомиладор ҳолда уйидан олиб кетилган. Бу ҳақда "Qumash.kz" хабар берди.
Марҳуманинг онаси адвокат Инга Иманбай билан бирга блогер Жан Ахмадиевга интервью берган.
Унинг сўзларига кўра, қизини Мадияр 17 ёшида уйидан олиб кетган. Ўша вақтда Мадина ҳомиладор бўлган.
"Қизим севиб қолгани учун турмушга чиққан", — деди марҳуманинг онаси.
Аёлнинг таъкидлашича, қизини ўша пайтда уйига қайтариб олмагани унинг энг катта афсуси бўлиб қолган. Шунингдек, у Мадинанинг ўз жонига қасд қилганига ишонмаслигини айтган.
Онасининг сўзларига кўра, қизининг танасида кўкариш ва тирналиш излари бўлган. Унинг сочларидан эса тупроқ ва сомон чиққан. Шу сабабли аёл ҳуқуқ-тартибот органларидан воқеани ҳар томонлама ва холисона тергов қилишни сўраган.
Марҳуманинг онаси Мадина ва Мадиярнинг никоҳи тўй билан бошланмаганини ҳам айтди. Унинг таъкидлашича, икки оила ўртасида тўй ёки қудалик маросими ўтказилмаган, фақат юз очди маросими бўлган.
Аёл ижтимоий тармоқларда тарқалган Мадияр оиласининг моддий аҳволи ҳақидаги маълумотларни ҳам рад этди. Унинг айтишича, Мадияр оиласига мунтазам равишда молиявий ёрдам кўрсатиб турган.
Жумладан, Мадиярнинг отаси қамоққа тушганида Мадина онасидан 700 минг тенге сўраган ва аёл бу маблағни берган. Бундан ташқари, Мадина бир неча марта мебель ва маиший техника харид қилиш учун онасидан ёрдам сўраган. Туғилган кунида эса онаси унга музлаткич олиш учун пул берган.
Блогер Жан Ахмадиевнинг айтишича, Мадинанинг яқинлари унинг буюмларини эрининг уйидан олиб кетмоқчи бўлганида, уларга ашёлар берилмаган. Қариндошларига ушбу буюмлар энди Мадиярнинг оиласига тегишли экани айтилган.
Мадина оиладаги ягона фарзанд бўлган. У жорий йилнинг 18 август куни 19 ёшга тўлиши керак эди.
