Украинанинг марказий қисмидаги Кривой Рог шаҳрида савдо марказига Россия дронлари билан зарба берилиши оқибатида камида 16 киши ҳалок бўлди. Бу ҳақда BBC хабар берди.
Маҳаллий расмийларга кўра, ҳужумда яна 130 киши, жумладан 23 нафар бола жароҳатланган. Қулаган бино вайроналари остида ҳали ҳам одамлар қолган бўлиши мумкин.
Украина президенти Владимир Зеленский ҳужумни "ўта кинёвий ва разил" деб атаб, зарба икки тўлқинда амалга оширилганини билдирди. Унинг айтишича, иккинчи зарба ҳодиса жойида ишлаётган қутқарувчиларга қаратилган.
BBC томонидан тасдиқланган видеоларда аллақачон ёнғин чиққан савдо марказига иккинчи дрон зарба бергани акс этган.
Днепропетровск вилояти раҳбари Александр Ганжа маълум қилишича, ҳозирда Кривой Рогдаги савдо марказида тўққиз киши, жумладан икки нафар бола бедарак йўқолган ҳисобланмоқда. Қидирув-қутқарув ишларига бошқа ҳудудлардан ҳам қўшимча гуруҳлар жалб этилган.
Россия ҳарбийлари ҳозирча ҳужум юзасидан изоҳ бермаган.
Шунингдек, Украина расмийлари Миколаев вилоятида Россия ҳужумлари оқибатида тўрт киши, Харков вилоятида эса яна икки киши ҳалок бўлганини маълум қилди. Запорожье шаҳрида дрон такси яқинида портлаши оқибатида уч киши жароҳатланган.
Ҳужум Киевга Россия томонидан амалга оширилган йирик ракета ва дрон зарбаларидан бир кун ўтиб содир бўлди. Унда пойтахтда 17 киши ҳалок бўлиб, 40 дан ортиқ одам жароҳатланган эди.
