Ўзбекистон қиличбозлиги афсоналаридан бири, Москва-1980 Олимпиадасининг кумуш медали совриндори ва Миллий олимпия қўмитасининг собиқ раиси Собир Рўзиев 73 ёшида вафот этди. Бу ҳақда Ўзбекистон Миллий олимпия қўмитаси матбуот хизмати хабар берди.
Собир Рўзиев спортчилик фаолияти давомида жаҳон чемпионатларида икки марта олтин, бир марта кумуш ва бир марта бронза медалини қўлга киритган.
У 1980 йилда Москвада ўтказилган ёзги Олимпия ўйинларида кумуш медалга сазовор бўлиб, ўзбек қиличбозлиги тарихида муносиб из қолдирган.
Рўзиев нафақат спортчи сифатида, балки соҳани бошқаришда ҳам фаол иштирок этган. У Миллий олимпия қўмитаси раиси ҳамда қиличбозлик федерацияси раҳбари сифатида фаолият юритган.
Унинг Ўзбекистон қиличбозлиги ривожига қўшган ҳиссаси эътироф этилиб, "Ўзбекистон Республикасида хизмат кўрсатган спортчи" фахрий унвони билан тақдирланган.
