Канада бош вазири Марк Карни АҚШнинг Канада товарларига 50 фоизлик бож жорий қилганидан сўнг Вашингтонга жавоб тариқасида янги тарифларни эълон қилди. Янги божлар 8 сентябрдан кучга кириши кутилмоқда. Бу ҳақда AlJazeera хабар берди.
Карнининг маълум қилишича, Канада тарифлари АҚШнинг пўлат, сут маҳсулотлари ва электроника каби соҳаларига қаратилган бўлади. Унинг таъкидлашича, янги чоралар Канада ишчилари, фермерлари, оилалари ва бизнесини ҳимоя қилишга қаратилган.
Аввалроқ АҚШ президенти Дональд Трамп Канаданинг 20 миллиард долларлик товарларига 50 фоизлик бож жорий қилган эди. Янги тарифлар вино, мебель, сут маҳсулотлари, цемент, кийим-кечак, балиқ овлаш анжомлари ва хоккей жиҳозлари каби маҳсулотларга таъсир қилади.
Карни музокаралар сўнгги кунларда АҚШ томони қабул қилиб бўлмайдиган шартларни илгари сургани сабабли тўхтаб қолганини айтди. У Канаданинг Вашингтон таклиф қилган шартларни қабул қилмаслигини билдирди.
Шу билан бирга, Канада бош вазири мамлакат ташқи савдо ва ҳарбий ҳамкорлик соҳаларида янги иттифоқлар тузишга интилишини маълум қилди. Айни пайтда Канада экспортининг қарийб 70 фоизи АҚШ бозорига тўғри келади.
