"Ҳа, албатта, одамлар учун муайян ноқулайликлар бор, лекин ҳукумат, албатта, буни назорат остида ушлаб туриши керак. Ҳамма масалалар ҳам ҳал этилгани йўқ, аммо улар ҳал қилинмоқда", деди Путин.
Унинг таъкидлашича, Россия Ҳукумати раиси ушбу масалаларни назоратга олган. Шунингдек, ёқилғи таъминотидаги муаммоларни ҳал этиш учун махсус комиссия тузилган.
Россиядаги айрим АЁҚШларда ёқилғи таъминоти билан боғлиқ муаммолар жорий йил май ойи охирида бошланган. Бунга Украина Қуролли Кучларининг Россиядаги нефтни қайта ишлаш заводларига берган зарбалари сабаб бўлган. Бу айрим ҳудудларда ёқилғи танқислиги ва нархларнинг ошишига олиб келган.
Июнь ойида Россия Бош вазири ўринбосари Александр Новак тегишли идораларга ички ёқилғи бозорини барқарорлаштириш чораларини ишлаб чиқишни топширган. Ўшанда авиация керосини экспортига тақиқ жорий этилган.
Июль ойи бошида эса ёқилғи таъминоти ишончлилигини ошириш мақсадида Россия нефтни қайта ишлаш заводларига йил охиригача Евро-3 стандартига жавоб берадиган бензинни сотишга рухсат берилган. Орадан бир неча кун ўтиб, дизель ёқилғиси экспортига ҳам тақиқ жорий этилган.
Шунингдек, Путин Россия ички бозорини ёқилғи билан таъминлашга қаратилган қонунни имзолаган. Ҳужжатга кўра, тўғридан тўғри ҳайдалган бензинни бошқа компонентлар билан аралаштиришга рухсат берилган.
Россия ёқилғи импортини ҳам бошлаган.
Новак аввалроқ ҳукумат томонидан кўрилган чоралар ўз самарасини бераётганини билдирган эди. Унинг айтишича, айрим ҳудудларда чекловлар бекор қилинмоқда, ишлаётган АЁҚШлар сони кўпайиб, навбатлар қисқармоқда.
Путин эса Россиядаги ёқилғи таъминоти билан боғлиқ муаммолар вақтинчалик эканини таъкидлаган.
