Португалиянинг "Реал Массама" клуби футболчиси Кевин Кастро ўртоқлик учрашуви вақтида майдонда ҳушидан кетиб, вафот этди. Бу ҳақда клуб матбуот хизмати маълум қилди.
Маълум қилинишича, воқеа 22 август куни "Эштрела да Амадора"га қарши ўтказилган ўртоқлик учрашувида содир бўлган. 25 ёшли ярим ҳимоячи учрашувнинг дастлабки дақиқаларида майдонда ҳушидан кетган.
Жамоаларнинг тиббий ходимлари зудлик билан футболчига биринчи ёрдам кўрсатган. Жумладан, дефибриллятордан фойдаланиб, уни реанимация қилишга уринган. Бироқ уринишлар самара бермаган. Кастро шифохонага олиб кетилган, аммо шифокорлар унинг ҳаётини сақлаб қола олмаган.
"Кевин Кастро шунчаки футболчи эмас эди. У бизнинг оиламизнинг бир қисми эди ва уни майдонда ҳам, ундан ташқарида ҳам таниш шарафига муяссар бўлган ҳар бир инсон қалбида из қолдирди", дейилади "Реал Массама" клуби баёнотида.
"Эштрела да Амадора" клуби ҳам Кастронинг оиласи ва "Реал Массама" жамоасига ҳамдардлик билдирди.
Кевин Кастро Португалияда туғилган бўлиб, Англиянинг Норфолк ҳудудида улғайган. У футболчилик фаолиятини "Спортинг" клуби академиясида бошлаган. Кейинчалик Англиянинг "Вест Бромвич Альбион", "Бертон Альбион", "Ноттс Каунти", "Гейтсхед", "Йорк Сити", "Чиппенхэм Таун" ва "Истборн Боро" клубларида тўп сурган.
Футболчининг ўлим сабаби ҳозирча расман маълум қилинмаган.
