Кемадаги бойликнинг бугунги қиймати юзлаб миллион фунт стерлингга баҳоланмоқда. Бу ҳақда хорижий оммавий ахборот воситалари хабар берди.
Маълум бўлишича, кема 1633 йил 10 июль куни Шотландиядаги Форт-Форт қўлтиғида кучли бўрон вақтида чўкиб кетган. У қирол Карл Iнинг Шотландияга тож кийиш маросими муносабати билан амалга оширган сафари чоғида Бёрнтайленддан Лейт портига қироллик юкларини олиб кетаётган бўлган.
Кемада 35 нафар йўловчи ва экипаж аъзоси бўлган. Уларнинг фақат икки нафари омон қолган. Қироллик юклари орасида олтин ва кумуш буюмлар, қимматбаҳо матолар ҳамда Генрих VIII буюртмаси билан тайёрланган 280 қисмдан иборат кумуш дастурхон анжомлари ҳам бўлган.
Тахминларга кўра, юкнинг ўша даврдаги қиймати 100 минг фунт стерлинг атрофида бўлган. Бугунги қийматда эса бу сумма юзлаб миллион фунт стерлингга тенг бўлиши мумкин. Айрим хабарларда кемада қарийб 5 тонна олтин ва кумуш бўлгани айтилмоқда.
Кемани топиш учун қидирув ишлари ўнлаб йиллардан бери давом этиб келади. 1990-йилларда ўтказилган сонар ва бошқа геофизик тадқиқотлар давомида денгиз тубида турли аномалиялар аниқланган, бироқ кеманинг айнан “Blessing of Burntisland” экани ҳанузгача тасдиқланмаган.
Сўнгги тадқиқотлар давомида сув остида кемага тегишли бўлиши мумкин бўлган ёғоч намунаси олинган. У радиокарбон усулида текширилади. Мутахассислар шу орқали топилманинг 1633 йилда чўкиб кетган қироллик кемасига тегишли ёки тегишли эмаслигини аниқлашга умид қилмоқда.
Қидирув ишларига раҳбарлик қилаётган Бёрнтайленд мероси ташкилоти вакили Иэн Арчибальд кеманинг топилгани ҳақида ҳозирча қатъий хулоса қилишга эрта эканини таъкидлаган. Унинг сўзларига кўра, аниқланган жой тарихий кема қолдиқларига мос келади, аммо унинг “Blessing of Burntisland” экани қўшимча тадқиқотлардан сўнг маълум бўлади.
Қайд этилишича, Форт-Форт қўлтиғи тубида юзлаб кема ҳалокатлари мавжуд. Шу боис топилманинг айнан қирол Карл Iга тегишли юкларни олиб кетган кема эканини тасдиқлаш учун археологик ва лаборатория тадқиқотлари ўтказилиши керак.
