АҚШ президенти Дональд Трамп мамлакат электр энергетика тизимига хориждан етказиб берилаётган ускуналар билан боғлиқ хавфлар сабаб миллий фавқулодда ҳолат эълон қилиш тўғрисидаги фармонни имзолади. Бу ҳақда “Zamon.uz” маълум қилди.
Фармонга кўра, хорижда ишлаб чиқарилган электр жиҳозлари ёки технологиялари миллий хавфсизликка таҳдид туғдириши аниқланса, АҚШ расмийлари уларни сотиб олиш, импорт қилиш, ўтказиш ва ўрнатишни чеклаши ёки тақиқлаши мумкин.
Трампнинг таъкидлашича, маълумотлар марказлари, сунъий интеллект технологиялари ва мудофаа саноатининг жадал ривожланиши АҚШнинг барқарор электр таъминотига бўлган қарамлигини янада оширган. Шу сабабли электр тармоғига қарши эҳтимолий ҳужумларнинг оқибатлари жиддий бўлиши мумкин.
Ҳужжатда айрим юқори кучланишли трансформаторлар, ақлли электрон қурилмалар, генераторлар, қуёш ва аккумулятор тизимлари учун инверторлар, шунингдек, электр тармоғидаги заифликлардан киберҳужумларда фойдаланиш имконини берувчи хорижий дастурий таъминот ва рақамли компонентлар хавф туғдириши мумкинлиги қайд этилган.
Трамп фармонда хориждан электр жиҳозлари етказиб берилиши билан боғлиқ вазият АҚШнинг миллий хавфсизлиги, ташқи сиёсати ва иқтисодиётига ғайриоддий ва жиддий таҳдид туғдириши мумкинлигини таъкидлаган.
