Аргентиналик мутахассис Кристиан “Кили” Гонсалес “Интер Майами” бош мураббийи этиб тайинланди. Бу ҳақда клуб хабар берди.
52 ёшли мураббийнинг жамоа билан тузган шартнома муддати ҳозирча маълум қилинмаган. Гонсалес зарур ишлаш рухсатномаларини олганидан сўнг “Интер Майами” билан иш бошлайди. Шу вақтга қадар жамоани Гильермо Ойос вақтинча бошқариб туради.
Гонсалес “Интер Майами”да 2026 йил апрелида жамоа бош мураббийлигидан кетган Хавьер Маскеранонинг ўрнини эгаллаган Ойос ўрнига келмоқда. Маскерано 2024 йил ноябридан 2026 йил апрелигача клубда ишлаган ва жамоа билан 2025 йилги МЛС чемпионлигини қўлга киритган.
Кристиан Гонсалес футболчилик фаолияти давомида “Реал Сарагоса”, “Валенсия” ва “Интер” каби клубларда тўп сурган. У “Валенсия” таркибида Испания чемпионатида ғолиб чиққан, шунингдек, Испания Суперкубогини қўлга киритган. “Интер” сафида эса икки марта Италия Кубоги соҳиби бўлган.
Гонсалес 2004 йилда Аргентина терма жамоаси билан Афина Олимпиадасида олтин медални қўлга киритган. Терма жамоа сафида у 50 дан ортиқ учрашувда майдонга тушган.
Мураббийлик фаолияти давомида аргентиналик мутахассис “Росарио Сентрал”, “Унион” ва “Платенсе” клубларида ишлаган. “Интер Майами” унинг Аргентинадан ташқаридаги илк мураббийлик фаолияти бўлади.
Энди Гонсалес “Интер Майами”да Лионель Месси, Родриго Де Пауль, Факундо Мура ва бошқа аргентиналик футболчилар билан ишлайди.
